കുംബ്ലെ - അനുയോജ്യനായ നായകന്‍.

അനില്‍ കുംബ്ലെയ്ക്ക് ഒരു ആമുഖം ആവശ്യമില്ല. തൊണ്ണൂറുകളുടെ തുടക്കം മുതല്‍ ഇന്ത്യന്‍ ബൌളിംഗ്‌ ഒറ്റയ്ക്ക് ചുമലിലേറ്റുന്ന മഹാനായ പോരാളി. ഈ കഴിഞ്ഞ പതിനേഴു വര്‍ഷങ്ങള്‍ക്കിടയില്‍ കുംബ്ലെയ്ക്ക് കൂട്ടായി വളരെയധികം പേര്‍ വന്നു.. ജവഗല്‍ ശ്രീനാഥ്, വെങ്കിടേഷ്‌ പ്രസാദ്‌ തുടങ്ങി പലരും.. ഇപ്പോള്‍ ഹര്‍ഭജന്‍ സിംഗിലും, സഹീര്‍ഖാനിലും, നമ്മുടെ സ്വന്തം ശ്രീശാന്തിലും എത്തി നില്‍ക്കുന്നു ആ ലിസ്റ്റ്‌. പക്ഷേ ഇപ്പോഴും മാറ്റമില്ലാത്തത്‌ കുംബ്ലെയ്ക്ക് മാത്രം.. മുപ്പത്തിയേഴാം വയസില്‍ രാജ്യത്തെ നയിക്കാനുള്ള ഭാഗ്യം (?) ഒടുവില്‍ കൂട്ടുകാരുടെ “ജംബോ“യ്ക്ക് കിട്ടിയിരിക്കുന്നു. പലതവണ പരസ്യമായി തന്റെ ആഗ്രഹം പറഞ്ഞിട്ടും കണ്ണടച്ച സെലക്ടര്‍മാര്‍ക്ക്‌ ഒടുവില്‍ കുംബ്ലെയെ തന്നെ ശരണം പ്രാപിക്കേണ്ടി വന്നു എന്നത്‌ സത്യം. മഹേന്ദ്ര സിംഗ്‌ ധോണി എന്ന പൊന്മുട്ടയിടുന്ന താറാവിനെ അത്രയെളുപ്പം കുരുതി കൊടുക്കാന്‍ കഴിയില്ല എന്ന്‌ സെലക്ടര്‍മാര്‍ മനസ്സിലാക്കിയത്‌ ഇന്ത്യന്‍ ക്രിക്കറ്റിന്റെ നല്ലതിനാവട്ടെ..

വിശേഷണങ്ങള്‍ ഏറെയാണ് ജംബോ ഭായ് ക്ക്‌.. തളരാത്ത പോരാളി എന്നത് അവയില്‍ ഒന്നു മാത്രം. കളിയെ സേവിക്കുന്ന, ടീമിനെ സേവിക്കുന്ന കുംബ്ലെയുടെ ഏറ്റവും മികച്ച വിശേഷണവും അതാണ്. ദിവസം മുഴുവനും ഒരേ എന്‍ഡില്‍ നിന്ന്‌ യാതൊരു മടിയും കൂടാതെ എത്ര ഓവറുകളും എറിയാനുള്ള സന്നദ്ധത. ആയിരക്കണക്കിന് എല്‍ ബി ഡബ്ല്യു അപ്പീലുകള്‍ നിരസിക്കപ്പെട്ടേക്കാം, അത്രയും തന്നെ ക്യാച്ചുകള്‍ തന്റെ കൂട്ടാളികള്‍ നിലത്തിട്ടേക്കാം.. എന്നാലും കുംബ്ലെ തളരില്ല. അല്പം പോലും നിരാശ പ്രകടിപ്പിക്കാതെ പന്തുമായി തന്റെ ബൌളിംഗ് മാര്‍ക്കിലേയ്ക്ക്‌ നടക്കുന്ന കുംബ്ലെ ക്രിക്കറ്റ് കാണുന്ന എതൊരു ഇന്ത്യാക്കാരനും പരിചിതമായ കാഴ്ചയാണ്. ഇതു പോലെ ഒരു പോരാളിയെ പിന്‍‌തുടരാന്‍ ഇന്ത്യന്‍ ക്രിക്കറ്റിലെ യുവത്വത്തിനു കഴിയില്ലെങ്കില്‍, മറ്റൊരാളെയും പിന്‍‌തുടരാന്‍ അവര്‍ യോഗ്യരല്ല..

വളരെയധികം മത്സരപരിചയമുള്ള ഒരാള്‍ തന്റെ പ്രകടനങ്ങളെക്കുറിച്ച്‌ ആരെയും ബോദ്ധ്യപ്പെടുത്തേണ്ടതില്ല. തനിക്ക്‌ എപ്പോള്‍ അവസരം കിട്ടുന്നു, ആരൊക്കെ വിമര്‍ശിക്കുന്നു എന്ന്‌ ആലോചിച്ച് തലപുണ്ണാക്കേണ്ടതില്ല. കൂട്ടുകാരുടെ ജംബോയ്ക്ക് ടീമംഗങ്ങളില്‍ നിന്ന്‌ ഏറ്റവും ഉയര്‍ന്ന ബഹുമാനം പ്രതീക്ഷിക്കാം. ഏറ്റവും മുതിര്‍ന്ന കളിക്കാരന്‍ എന്ന നിലയിലും, തളരാത്ത പോരാളി എന്ന നിലയിലും.

പ്രകടനങ്ങളെക്കുറിച്ചോര്‍ത്ത്‌ കുംബ്ലെ തലപുണ്ണാക്കില്ല എന്നെനിക്കുറപ്പുണ്ട്. കളിയെ അറിയുന്ന, കളിക്കാരെ അറിയുന്ന, എന്നും ബൌളിംഗിന്റെ അടിസ്ഥാന പാഠങ്ങളായ ക്ഷമയിലും കൃത്യതയിലും മാത്രമൂന്നി കുംബ്ലെ വരികയാണ്. കൂട്ടുകാരുടെ സഹകരണവും പ്രയത്നവും മാത്രം ആവശ്യപ്പെട്ടു കൊണ്ട്.. പുതിയ ടീം ഇന്ത്യയെ വാര്‍ത്തെടുക്കാന്‍.. യുവത്വത്തിനെ നേരായ ദിശയില്‍ നയിക്കാന്‍.. പ്രാര്‍ത്ഥിക്കാം നമുക്ക്.. ഇന്ത്യയുടെ എക്കാലത്തെയും മികച്ച ബൌളര്‍ നമ്മളെ നിരാശരാക്കില്ല എന്ന്‌..